LAOAG CITY – Inpasardeng pay laeng ti Department of Agriculture ti panaglako ti ₱20 iti kada kilo ti bagas idiay Cebu kalpasan laeng ti maysa nga aldaw a rollout idi kalman, Mayo 1.
Daytoy ket maiyallubog iti pammilin ti Commission on Elections nga isardeng pay laeng ti proyekto agingga inton malpas ti 2025 National and Local Elections.
Naammoan a ti laeng sangapulo a kilo ti bagas ti gatangen iti kada indibidual a maipangpangruna dagiti senior citizen, solo parent ken Persons With Disability.
Inbatad ni Department of Agriculture Secretary Francisco Tiu Laurel Jr., naiget ti suporta ni Presidente Ferdinand Marcos Jr. iti proyekto ngem inpasardengna pay laeng daytoy tapno maliklikan ti posible a kaso ken isyu iti panangpulitika.
