LAOAG CITY – Inreklamo ti maysa nga indibidual ti kellaat a panagngato ti plete ti UV Express a Laoag-Cagayan.
Inbatad ni Mr. Arthur Villamin a ti pletena laeng dati manipud centro ti Sta. Praxedes, Cagayan ket Php200.00 agingga Php220.00 ngem nasingir daytoy ti Php300.00.
Kuna ni Villamin a saan a nainkalintegan daytoy nangruna ta awan ti mandar ti Land Transportation Franchising and Regulatory Board (LTFRB).
Mainaig iti daytoy, sinungbatan met ni Mr. Fernando Sales, ti Manager ti UV Express Laoag-Cagayan a daytoy ket adda ti imbilin ti ahensia no sadinno a nangrugi idi Pebrero gapu iti panagngato ti presio ti petrolio.
Inlawlawagna a saanda a sinurot nga insigida ti bilin gapu ta maabakanda aglalo no maamoanda a nanginngina ti plete iti bangir a kapada da ti serbisio.
Nupay kasta, kunana a no saan a kayat dagiti pasaheros ket mabalinda nga ibaba iti agingga Php250.00 numan pay marigatanda nangruna ta 5 agingga 8 laeng ti makargada a pasaheros no dadduma.
