LAOAG CITY – Inpakaammo ni Engr. Randy Nicolas, ti Provincial Disaster Risk Reduction and Management Council nga adda ti panagreggaay ti daga iti ili ti Adams.
Gapu iti daytoy, inpalgakna a saan a passable wenno saan pay laeng a madalyasatan ti kalsada manipud iti ili ti Pagudpud agingga iti ili ti Adams.
Inbatadna a gapu iti nakaro a layos a napasaran iti lugar gubuay iti Bagyo Julian ket adda dagiti nadadael a flood control.
Inlawlawagna nga adda dagiti sumagmamano a residente a naibakwit kadagiti evacuation center kas ditoy siudad ti Laoag, iti siudad ti Batac, iti ili ti Pagudpud, Piddig, Vintar ken dadduma pay.
Kunana a nakasagana dagiti heavy equipment iti Provincial Engineering Office no ingkaso nga adda dagiti agkasapulan ti tulong.
Innayonna a naiget pay ti pannakikammayetda iti Philippine Coast Guard ken Department of Social Welfare and Development para iti al-alisto a pannakaipadanon ti tulong kadagiti maseknan nga umili.
