LAOAG CITY – Rimmuar iti maysa a panagadal a ti panagtumar ti metformin ket adda ti benepisiona kadagiti babbai nga addaan ti gestational diabetes kangrunaanna kadagiti masikog.
Inadal dagiti eksperto no adda dagiti baro a methods tapno makatulong kadagiti masikog iti panangtaming iti gestational diabetes mellitus.
Segun ken ni Dr. Meghana Limaye, maternal-fetal medicine specialist ken clinical assistant professor makapainteres daytoy a panagadal gapu ta awan pay ti adu a randomized controlled trials kadagiti placebo para iti panangmanehir ti gestational diabetes.
Ti metformin ket para kadagiti addaan ti Type 2 diabetes ngem saan pay a maus-usar para iti gestational diabetes gapu ta dumalan iti placenta.
Malaksid iti daytoy, rimmuar pay iti panagadal a ti metformin ket natalged a mausar tapno makissayan ti panagusar ti injection-administered insulin shots.
Nupay kasta, naduktalan dagiti agsuksukisok a ti panagadal ket saan a nadisenio a mangipasingked ti kinatalged ti metformin maipapan kadagiti specific outcomes.
