LAOAG CITY – Naiget a kinondenar ti Democrats lawmakers ti nagbalin a tignay ni United States President Donald Trump kontra iti Iran.
Inbatad ni Jack Reed, top Democrat iti Armed Services Committee, inkabil ni Trump ti pagilian iti dakkel a gubat kontra iti Iran nga awan ti nalawag a rason, pammalubos ti Kongreso wenno plano no kasano a lippasen ti rinnupak.
Inlawlawagna a nagtalinaed a saan nga ammo dagiti Amerikano ti pudno a gastos, peggad ken kinapaut ti gubat.
Binabalaw ni Bernie Sanders ti administrasion a kunana nga ilegal, planado ken maikanniwas iti konstitusion ti pagilian ken inpakaammona a luklukwen ti gobierno ti publiko mainaig iti pudno nga epekto ti rinnupak a mangitunda ti nayon a riribuk.
Kabayatanna, inakusaran ni Ruben Gallego ni Trump a maisupadi iti kampaniana a kissayan ti military interventions ken iruar dagiti dokumento mainaig iti natay a ni Jeffrey Epstein.
Immunan a kiniddaw ni United States Senate Minority Leader Chuck Schumer nga ikkan ti briefing ti Kongreso mainaig iti operasion ken binabalawna ti posibilidad ti maysa nga awan ti patinggana ken nagastos a gubat iti Middle East.
Inpakita met dagiti Republican ti suportada ken ni Trump mainaig iti desision a rauten ti Iran.
Kuna ni Mike Johnson, Speaker ti United States House of Representatives a sangsangoen ti Iran ti nadadagsen a kaipapanan ti dakes ken dagiti aramid a terorismo pakairamanan ti panangpapatay kadagiti Amerikano ken panagaramid ti nuclear.
Dinakamatna ti kararag para iti kinatalged dagiti suldado a makipaset iti ‘Operation Epic Fury.’
Inawagan pay ni United States Senator Lindsey Graham a nabayagen a supporter ti United States military intervention kontra iti Islamic republic a ti panagbitla ni Trump ket mairaman iti pakasaritaan kas panangrugi ti historic a panagbalbaliw iti Middle East iti uneg ti maysa a ribu a tawen.
