LAOAG CITY – Inpetteng ni Sec. Francis Tolentino nga agtultuloy nga ilablaban ti Department of Labor and Employment (DOLE) ti karebbengan ken pagsayaatan dagiti mangmangged.
Daytoy ket iti baet ti maipatpatungpal a legal a proseso mainaig iti temporary restraining order (TRO) a nangipasardeng iti implementasion ti minimum wage hike iti National Capital Region (NCR).
Segun iti sekretario, kadua ti Department of Labor and Employment dagiti mangmangged iti panangilungalong iti dignidad ken pagsayaatan dagitoy iti babaen ti anag ti tripartismo.
Inbatadna nga agtultuloy a supsuportaran ti Department of Labor and Employment ti wage hike ken nagtalinaed a kumpiansa a masolbar ti nasao a banag iti babaen ti umno a legal a proseso.
Immunan nga inrakurak ni Tolentino a kumpiansa isuna a masolbar iti legal a wagas ti pannakaitantan iti nayon a sueldo tapno masigurado ti maawat dagiti mangmangged ti naikeddeng nga adjustment iti sueldo dagitoy.
Innayonna ti natibker a takder ti Department of Labor and Employment iti panangilungalong ti karebbengan dagiti mangmangged iti babaen ti pammilinna a mangipasdek ti Labor Attorneys’ Office (LAO) a mangipaay ti libre a legal assistance kadagiti mangmangged nga agkasapulan.
