LAOAG CITY – Maur-urnos ti panangipaay ti gobierno probinsial iti babaen ti Metro Ilocos Norte Council wenno MINC ti “Aid to PUV’s in Crisis Situation 2” para kadagiti kameng ti Tricycle Operators and Drivers Association wenno TODA.
Inbunannag ni Atty. Nikki Pilar, mangidadaulo ti MINC a paiyal-alisto ni Gob. Matthew Marcos Manotoc ti pannakaisagana ti “payroll” dagiti maseknan a traysikelan.
Nupay kasta, inlawlawagna a mabalin pay laeng dagiti saan pay a nakapagpalista ti agturong iti opisinada tapno maikamakam a maipaayan ti tulong.
Imbatadna a ti laeng kasapulan nga ipakita dagitoy ket ti “franchise” ken ti MTOP wenno Motorized Tricycle Operators Permit.
Segun ken ni Pilar, manamnama a mairugi iti mabiit ti pannakaibunong ti uppat a ribu a pisos para iti tunggal maysa a kameng ti TODA.
Kunana nga iti agdama ket umab-abot iti 16,000 ti bilang dagiti traysikelan a nakarehistro iti MINC.
Immun-una ngem iti daytoy, nasursurok ngem sangaribu a kameng ti Jeepney Operators and Drivers Association ti immawaten ti uppat a ribu a pisos ti tunggal maysa iti babaen ti maikadua a bansada ti Aid to PUV’s in Crisis Situation.
Kabayatanna, umab-abot iti sangapulo ket lima ribu a trisikelan ti nabenipisiaran iti umuna a bansada ti Aid to PUV’s in Crisis Situation ken tallo ribu a pisos ti naawat iti iti tunggal benepisiario.
