LAOAG CITY – Inlawlawag ni Atty. Juanito Antonio a ti Witness Protection Program (WPP) ket panangipaay ti security protection kadagiti prospective witness.
Segun kenni Antonio, masigurado ti seguridad na tapno makikooperar tapno ibaga na amin nga ammo na mainaig iti isyu ken mapagsungbat dagiti kangrunaan a nagbasol.
Inbatad na a sagudayen ti Republic Act 6981 wenno Witness Protection, Security and Benefit Program a masapol nga ibaga amin ti witness ti ammo na mainaig iti maysa nga isyu, maprotehiran dagiti napapateg nga impormasyon, sumurot iti civil obligations, makikooperar iti nayon a reasonable request ken dadduma pay.
Linawlawagan na a saan a gapo ta maipan iti Witness Protection Program ti maysa nga indibidual ken nagibaga kadagiti amin nga ammo na mailiklik metten iti kaso.
Daytoy ket gapo ta sabali ti pannakaipan iti maysa a tao iti Witness Protection Program ken ti panagbalin nga state witness.
Innayon na nga agbalin laeng nga state witness ti maseknan nga indibidual no naipilan ti kaso iti korte.
Mainaig iti daytoy, kunana a no mapaneknekan a madikdiktaran dagiti adda iti Witness Protection Program ket mabalin nga ibabawi ti estado ti proteksyon gapo ta prebelihiyo laeng daytoy.
Maipalagip a dagiti dati a kameng ti Department of Public Works and Highways (DPWH) ket agkidkiddw ti proteksyon kabayatan ti panagdengeg ti Senate Blue Ribbon Committee mainaig iti anomalya a flood control projects.
