LAOAG CITY – Maitultuloyen ti pannakaisayangkat ti Himala sa Buhangin Ilocos Norte Arts and Music Festival iti tunggal bulan ti Nobiembre mangrugi ita a tawen 2024.
Daytoy ti naragsak nga inpakaammo ni Mr. Xavier Ruiz, Office In Charge ti Provincial Tourism Office.
Segun kenkuana, babaen iti daytoy ket ad-adda a marikna dagiti umili ken turista ti naragsak nga aktibidad ken programa iti kurruoy ti Paoay San Dunes iti nalamlamiis a panawen.
Inbatadna a no idasig iti naglabas a tawen ket maiyuswat daytoy iti bulan ti Mayo no sadinno a maigiddan ti panawen ti kalgaw wenno summer season a rason no apay limitado laeng dagiti maisayangkat nga aktibidad gapu iti kinabara ti paniempo.
Inlawlawagna a daytoy ti kangrunaan a rason no apay a napanunotan ni Gov. Matthew Marcos Manotoc nga iyakar ti nakadawyan a bulan a pannakaiyuswat ti Himala Sa Buhangin tapno maliklikan ti saan a napintas a mapasamak kadagiti makidanggay ti nasao nga aktibidad.
Kunana nga iti daytoy a tawen ket maiwayat dagiti nakadawyan nga aktibidad kas ti libre a 4×4 rides, Sand Castle Competion ken Music Festival no sadinno nga adda dagiti agbalin a naisangsangayan a bisita iti industria ti musika tapno mangipaay ti ragsak kadagiti umili.
Nupay kasta, iti agdama inbatad ni Ruiz a manarimaanda pay laeng nga ipinpinal dagiti aktibidad nangruna iti baro a programa nga ipaayda kadagiti tattao tapno magutigotda a makipagpartisipar.
Innayonna nga apaman a malpasda daytoy ket dagusda met laeng nga ipakaammo iti publiko tapno ad-adu ti maallukoy ken mapadur-as iti benneg ti turismo ditoy probinsia.
