LAOAG CITY – Inlawlawag ni Dr. Samantha Licudine, City Veterinarian a ti pannakatay dagiti sangapulo a baboy iti Brgy. Rioeng ditoy siudad ti Laoag ket saan a gapu iti African Swine Fever wenno ASF virus.
Gapu iti daytoy, inpasingkedna a nagtalined nga African Swine Fever free ditoy siudad ti Laoag kas maibasar iti kaudian a datos ti Disease Investigation.
Inlawlawagna nga apaman nga adda ti naawatda a report maipanggep kadagiti baboy a natay ket dagusda nangiwayat ti Disease Investigation tapno maduktalan ti pudno a rason a pannakatay dagiti baboy.
Kunana a nagturongda mismo iti maseknan a pagtaraknan kadagiti baboy no sadinno a naobserbaranda nga adda dagiti dadduma a baboy nga aktibo wenno adda iti nasayaat a kasasaad.
Innayonna a saanna nga ipalubos nga adda ti tumaod nga African Swine Fever virus iti nadakamat a lugar.
Naammoan a ti kangrunaan a nangitunda ti pannakatay dagiti nasao a baboy ket gapu iti panateng ken sumagmamano kadagitoy ket naalisan.
Kabayatanna, inpakaammo ti City Veterinarian a naiget ti panangmonitorda kadagiti online sellers nga aglaklako kadagiti produkto a saan a rehistrado iti Food and Drug Administration.
