LAOAG CITY – Inlawlawag ni Mr. William Ulep, ti Municipal Agriculturist iti ili ti Bacarra a saan nga African Swine Fever ti maikagapo ti pannakatay dagiti sumagmamano a baboy.
Segun kenni Ulep, na-assess ti baboy ken daytoy ket gagangay laeng a panagpisti ti baboy.
Mainaig iti daytoy, kunana nga awan ti mapalubusan nga agparti ti baboy kadagiti barangay malaksid no daytoy ket maipaay kas ayuda.
Kunana a nasken nga amin a maparti ket dumalan iti slaughter house gapo ta isu ti pagalagadan iti panagparti ti baboy.
Inbatad ni Ulep a saan da met a malapdan ti panagpanic dagiti agtartaraken ti baboy isut gapo na nga ilako da dagiti baboy da.
Kuna ni Ulep a mapalubusan met a mairuar dagiti baboy ngem sumagmamano laeng tapno saan met a maawanan ti suplay iti ili da.
Inpetteng na nasken a nasalun-at ti baboy a mairuar ken addaan ti sertipikasyon ken iti pink zone met laeng ti pakaipanan na no mapalubusan.
Inpalgak na a masapol a maipakammo pay nga ummuna iti barangay no kalikagom ti maysa nga hog raiser a mangiruar wenno mailako iti baboy na.
Kabayatanna, kunana nga iti agdama ket makaanay met pay laeng ti suplay ti karne ti baboy iti ili ti Bacarra.
