LAOAG CITY – Maysa a pasdek negosyo ti natawakan babaen kadagiti saan pay nabigbig a suspek iti Brgy. 54-A Lagui-Sail ditoy siudad ti Laoag.
Inbatad ni PLt.Col. Joseph Baltazar, hepe ti PNP ditoy siudad ti Laoag a basar iti palawag ti agtagikua a ni Melanie Remegio Wanya, agtawen ti 45, naaasawan ken residente iti Brgy. 55 Salet Bulangon ket naduktalan daytoy a naiwar-wara dagiti ramit ken nagduduma a lako da idi lukatan na ti store ken karinderya.
Inbatad na a mapatta-patta a nasurok 20 a ribo a pisos a balor dagiti lako da iti store ti natakaw pakairamanan ti mapatta-patta nga uppat a ribo a pisos a cash a naala iti kaha.
Mainaig iti daytoy, kuna ni Baltazar a basar iti CCTV footage ket dua dagiti nangserrek iti pasdek ken agpada a nakaabungot dagitoy.
Naipaima iti PNP-Crime lab ti cctv footage para iti naan-anay a panangberipikar ken pannakbigbig kadagiti suspek.
Nagballaag ti hepe ditoy siudad ti Laoag a nasken nga agbalin nga alerto ken inpakaammo na a maigetan ti koordinasyon da kadagiti opisyal ti barangay tapno maliklikan a maulit ti napasamak nga insidente.
