LAOAG CITY – Bimmisita ni Presidente Ferdinand Marcos Jr. iti merkado publiko iti siudad ti Batac tapno personal nga inspeksiunen ti nagbalin a kasasaad ti lugar kalpasan a nauram daytoy idi Hulio 5.
Bayat ti panagbisita ti Presidente, nangipaay daytoy ti P150 million a pondo babaen ti Local Government Support fund (LGSF) para iti lokal a gobierno ti siudad ti Batac para iti pannakaipabaro ti nasao a nauram a merkado publiko.
Bayat ti panag-inspeksion ti Presidente, kinadua daytoy da Department of Social Welfare and Development (DSWD) Secretary Rex Gatchalian, Congressman Angelo Marcos Barba, Governor Cecilia Araneta Marcos, Mayor Mark Christian “Markee” Chua, Bise Mayor Albert Chua ken dagiti miembro ti Sangguniang Panlungsod.
Kabayatanna mainaig iti daytoy, manamnama ti pannakaipasdek ti baro a merkado publiko iti baro nga Economic Zone ti siudad, asideg iti Bagsakan ti Norte.
