LAOAG CITY – Naaramid a nalappedan dagiti kameng ti Philippine Coast Guard ti plano a mangipatakder ti artificial island ti China iti Escoda Shoal.
Daytoy ket gapu iti presensya ti Philippine Coast Guard iti lugar no sadino ket nangipatulod ti nakaro a mensahe a saan nga ‘helpless’ ti Pilipinas kontra kadagiti iligal nga aktibidad ti China iti West Philippine Sea.
Segun ken ni Philippine Coast Guard spokesman for West Philippine Sea Commodore Jay Tarriela nga epektibo a pinasardeng ti Philippine Coast Guard ti Chinese Coast Guard kadagiti iligal nga aktibidad iti Escoda Shoal.
Inbatad ni Tarriela nga agsardeng ti China kadagiti aktibidadda gapu iti presensiya ti Philippine Coast Guard ngem nangi-deploy kadagiti divers-da no sadino mangisaysayangkat ti measurement.
Iti agdama, naka-deploy iti West Philippine Sea ti BRP Teresa Magbanua no sadino 26 nga aldaw daytoyen iti paset ti Escoda Shoal.
Kuna ni Tarriela a dakkel a tulong iti panagbantay ti teritorio iti West Philippine Sea ti panagsangpet ti 97-meter vessel manipod idiay Japan.
Immunan a kiniddaw ni Presidente Ferdinand Marcos Jr. iti Japanese government para iti panaggatang iti nasao a barko.
