LAOAG CITY – Kalikagum ti Provincial Government of Ilocos Norte a masigurado a napintas iti pannakaipatungpal ti He Sha iti dredging project ditoy siudad ti Laoag kangrunaanna iti Padsan River.
Segun iti gobierno probinsial, masapul a maiyalisto ti pannakakutkut ti nasao a karayan kabayatan a napintas ti sasaaden ti panawen.
Kabayatanna, nagyaman ti probinsia iti nasao a kompania iti agtultuloy a panangipapaayda ti Corporate Social Responsibility dagitoy kadagiti barangay ditoy siudad ti Laoag a naapektaran iti pannakakutkut ti Padsan River.
Naammoan a sumurok 1.2 a milyon a pisos ti kaudian nga inpaayda kangrunaanna kadagiti gunglo dagiti mangngalap iti Metro Lapaz.
Malaksid iti daytoy, nangipaayda pay kadagiti ramit para iti panagkalap ken dagiti fishery inputs.
