LAOAG CITY – Namisaan sakbay a naitabon idi malem ti pimmusay a tricycle driver a nagpositibo ti covid-19 iti Barangay 24 iti ili ti San Nicolas.
Naitabon ti bangkay ti nasao a tricycle driver iti maar-aramid nga echo park ngem adayo iti sanitary landfill iti nasao nga ili.
Karaman kadagiti nagatendar iti pannakaitabon ti nasao a tricycle driver ket ni Mayor Alfredo Valdez ken dadduma nga empleado ti lokal a gobierno iti ili ti San Nicolas.
Saanen a nagatendar ti pamilya ti tricycle driver gapu ta immunan a napan da kinita iti bigat.
Inlawlawag ni Mayor Valdez a saan nga iti kamposanto ti nakaitabonan ti tricycle driver gapu ta ti protocols ket masapol a maisina ken adayo iti balbalay ti pakaitabonan dagiti pumusay gapu iti covid-19 virus.
Innayon na a no bilang adda manen ti pumusay gapu iti covid-19 iti nasao nga ili ket iti maar-aramid nga echo park ti pakaitabonan amin.
Kabayatanna, inlawlawag ni Mrs. Florence Molina no apay a saan da nagatendar iti pannakaimisa idi malem ti pimmusay nga asawa na a maysa a tricycle driver a nagpositibo ti covid-19.
Inbatad na a napan da iti bigat ngem gapu iti kinabangsit ti lugar, ado ti basura ken naasok gapu ta 10 a metro laeng ti kaadayo na manipod iti pagbasuraan ti nakaitabonan ti bangkay ti asawa na.
Kuna na a no nakita da a nadalos ti nakaitabonan ti bangkay ti asawa na ket napan da koma nagatendar a pamilya na iti naiwayat a misa.
Nupay kasta, inbaga ni Molina a kabayatan ti misa ket nakita a nadalos ken napatagen ti nakaitabonan ti asawa na.
Iti baet daytoy, kuna ni Molina a kayat da latta a maiyakar ti asawa na iti kamposanto tapno adda met laeng ti mapan da sarsarungkaran.
Kabayatanna, inpakaammo ni Molina a saan da pay a naala ti resulta ti RT-PCR test ti asawa na gapu ta saan nga ited ti Mariano Marcos Memorial Hospital and Medical Center iti ciudad ti Batac no awan ti authorization letter da.
Masdaaw ni Molina no apay a dumawat pay laeng ti ospital ti authorization letter idinto nga asawa na ti pimmusay ken nabayadan da aminen a bill da iti ospital.
Immun-una iti daytoy, inbaga ni Molina a ti latta ipetpetteng ti Rural Health Unit (RHU) iti ili ti San Nicolas ket covid-19 ti nakatayan ti asawa na idinto a damo na ti naatake ken naaddaan metten ti pneumonia.
Innayon ni Molina a ti pay kasakit ti nakem da ket naipakaammo laengen kadakuada a pimmusay ti asawa ken ti koma kayat da ket natawagan da idi 50-50 ti lakay na.
Mainaig iti daytoy, immapela ni Mrs. Molina ken ni Mayor Alfredo Vadez nga ipalubos da koma a maiyakar iti kamposanto ti asawa na iti kabiitan a panawen.
Inpakaammo ni Molina a ti naibaga kadakuada ket 5 a tawen ti palabsen sakbay a mabalin a maiyakar ti asawa na iti kamposanto, ngem saan a maawat daytoy ti maseknan gapu ta amangan no nagaburan ton ti ado a basura iti lugar.
