LAOAG CITY – Nangrugin ti Philippine National Police (PNP) ti nationwide manhunt kontra ken ni Sen. Ronald “Bato” dela Rosa mainaig iti warrant of arrest nga inparuk-at ti International Criminal Court (ICC).
Inbatad ni Philippine National Police Chief Gen. Jose Melencio Nartatez Jr. a naiwarasen dagiti tracker team kalpasan nga inpalubos ti Department of Justice (DOJ) ti panangipatungpal iti panangarestar kontra iti senador.
Inlawlawagna a nabilin dagiti pulis nga ipakat ti maximum tolerance ken suroten ti umno a proseso iti operasion tapno maprotektaran ti karebbengan ti amin a karaman.
Kunana a no maarestar ni Dela Rosa ket insigida daytoy a maipadalan iti babaen ti Department of Justice.
Kabayatanna, saan pay laeng nga inbutaktak ti Department of Justice no insigida nga ikabil ni Dela Rosa idiay The Hague, Netherlands no sadinno a masarakan ti detention facility ti International Criminal Court.
Kinumpirmaran met ti Criminal Investigation and Detection Group (CIDG) nga iggemdan ti kopya ti International Criminal Court arrest warrant kontra iti senador.
Inpetteng ti Criminal Investigation and Detection Group nga adda pay laeng ditoy Pilipinas ni Dela Rosa iti baet kadagiti report a maipagarup a nakita isuna idiay Malaysia.
Nagballaag ti pulisia a mabalin a kasoan ti obstruction of justice ti asinoman a tumulong ken manglapped iti panangipatungpal ti warrant.
Malaksid iti Philippine National Police, nangiwayat met ti agsina nga operasion ti National Bureau of Investigation (NBI) tapno biroken ti senador.
