LAOAG CITY – Naglikudan ni PLt. Rudy James Jacalne iti ili ti Piddig ti akusasyon ti menor de edad a ni Mr. Sean Lorenzo iti Brgy. Calluza iti nasao nga ili a nadangran babaen kenkuana ken kadua na iti kapulisan.
Segun ken ni Jacalne, adda ti timmawag kenkuana nga adda ti maipagarup a nagkakabail iti Brgy. Calluza ken maysa ni Lorenzo kadagitoy.
Kuna na nga apaman nga adda da iti Gaki Theater ket dita a nakita na ni Lorenzo nu sadino a naamoan na nga adda iti impluwensya ti nasanger daytoy ket addaan ti ikot a balisong.
Inbatad na a kas trabaho ti kapulisan naipan iti stasyon ti pulisya ni Lorenzo.
Mainaig iti daytoy, inpetteng ni Jacalne a ti alegasyon ti ubing a binaot na ti arnis ken dadduma pay ket saan a pudno.
Innayun na a nu adda man ti itutok na a paltog iti menor de edad ket nu laeng dakkel ti nagbasolan na.
Immunan nga inbunannag ni Jacalne nga arig a sakit ti ulo iti ili ti Piddig ti menor de edad gapu iti naruay a rekord na.
Kuna na nga uray iti pagadalan da ket kanayun a manggulo ken adda pay ti gundaway a binuong na ti sarming ti tourism office ken dadduma pay nga agkakamadi nga aramid.
Inbatad ni Jacalne a maysa a kapitan ti ama daytoy ngem arig a saan a mapatalna dagiti madi nga ar-aramiden na rason nga isu pay ti nakaimibitaran na iti stasyon da.
Kabayatanna, kuna ni Jacalne nga addan ti panangimbitar na iti kapitan nga ama ni Lorenzo ngem awan pay ti panagparparang daytoy ken ti laeng asawa na ti sumangsango kadakuada.
Inbatad ti hepe a nakasagana ken ti kapulisan iti ili ti Piddig nu bilang mangipila ti reklamo ti maseknan a menor de edad ken pamilya daytoy.
