LAOAG CITY – Kinumpirmaran ni Police Supt. Edwin Balles, ti chief of police ditoy ciudad ti Laoag ti pannakasuspenso ti maysa a kameng ti pulisya iti 60 nga aldaw.
Segun kenkuana, nangrugi ti pannakasuspenso ni PO2 Allan Divina iti Investigation Section ditoy ciudad ti Laoag idi Abril 10.
Inlawlawag na nga inreklamo ti maysa a PO1 nga adda iti babaen ti field training program a recruit iti National Capital Region ni Divina gapu ti maipagarop a panangdangran na kenkuana.
Inbatad ni Balles a segun iti imbestigasyon ket dinangran ni Divina ti saanen a nabigbig a biktima kalpasan a saan a nagtungpal iti paar-aramid na.
Rumrumuar a namin-ado a daras a pinag-exercise ni Divina ti biktima ngem idi saanen a kabaelan ti maseknan ket nagsardeng.
Nupay kasta, kinagura ni Divina isut gapu na a maipagarop a dinangran na ti biktima.
Innayon ni Balles nga adda dagiti ebidensya a mangipaneknek a pudno iti alegasyon kontra ken ni Divina.
