LAOAG CITY – Sinelebraran ni Pope Francis ti maika-12 nga anibersario iti panagtugawna iti puesto kas lider ti Simbaan Katolika.
Basar iti Vatican, saan pay a pinalubosan dagiti doktor ti Santo Papa a makaruar iti Gemelli hospital gapu ta naiget a pay laeng a mabanbantayan ti situasion iti salun-atna.
Naammoan nga agarup maysan a bulan ti panagytalinaed ti agtawen ti 88 a Santo Papa iti ospital nga agtultuloy a sumaysayaat ti salun-atna gapu iti double pneumonia.
Agtultuloy met ti pannakipaset ti Santo Papa kadagiti sumagmamano nga aktibidad ti simbaan a daytoy ket maiwaywayat iti babaen ti online.
Maipalagip nga idi Marso 13, 2013 idi naelektaran ni Pope Francis kadagiti Roman Catholic cardinals tapno idauloan ti sumurok 1.4 a bilyon a Katolika iti intero a lubong.
