LAOAG CITY – Ibilang ni House Deputy Minority Leader ken Akbayan Party-list Rep. Perci Cendaña nga arig tinakawan ken na-snatch ti nayon a sueldo dagiti mangmangged.
Mensahe daytoy ni Cendaña kagiddan ti preliminary injunction nga inyetnag ti Pasig Regonal Trial Court (RTC) a mangiyal-alud-od ti pannakasuspenso ti pannakaipatungpal ti 85 pesos a wage increase iti National Capital Region (NCR).
Inbatad ni Cendaña a gapu iti Temporary Restraining Order (TRO) nga immuna nga inparuk-at ti Pasig RTC ket P780 a saan pay a naawat dagiti minimum wage earners.
Nadismaya ni Cendaña a gapu iti preliminary injunction ket ad-adda pay a dumakkel ti balor ti saan a maipapaay kadagiti mangmangged.
Gapu iti daytoy, inpettengna manen a kasapulan nga iyal-alisto nga ipasa ti gakat a P200 daily minimum wage increase.
