LAOAG CITY – Ginutigot ni House Deputy Minority Leader ken Akbayan Partylist Rep. Perci Cendaña ti administrasion ni Presidente Ferdinand Marcos Jr. a mangiparuk-at ti Executive Order nga ideklarar ti Hulio 12 kas West Philippine Sea Victory Day.
Panawagan daytoy ni Cendaña kagiddan ti maika-10 nga anibersario ita ti West Philippine Sea arbitral victory.
Inpettengna a daytoy ket dakkel a balligi ti Pilipinas iti maipapan ti world policy a nasken a maipakaammo ken maawatan dagiti amin a Pilipino.
Ti kiddaw nga Executive Order ni Cendaña ket kaarngi ti ordinansa nga inparuk-at ti lokal a gobierno ti Palawan idi 2024 a mangibilbilin ti tinawen a panagobserbar ti West Philippine Sea Victory Day.
Dinakamat ni Cendaña nga umad-adu metten dagiti Local Government Unit nga addaan ti kapada nga ordinansa kas ti Cebu City, Zamboanga City, Antipolo City ken dadduma pay.
