LAOAG CITY – Napalaos ti ragsak dagiti Ilocano iti nagbalin a selebrasyon ti Tan-ok ni Ilocano: Festival of Festivals ditoy Ilocos Norte iid kalman kalpasan a personal nga indauloan daytoy ni Presidente Ferdinand Marcos Jr.
Daytoy ket kageddan ti pormal a pannakalukat iti publiko ti napabaro a Ferdinand E. Marcos Stadium ditoy siudad ti Laoag.
Iti panagbitla ni Presidente Marcos Jr., kiniddaw na kadagiti Ilocano ti agtulultuloy a panangsuporta ken panangusar kadagiti kultura, nagduduma a pammati ken tradisyon pakairamanan ti bukod nga heritage ti Ilocos Norte.
Kuna na a babaen iti Tan-ok Festival ket napateg a magutigot dagiti in-inaudi nga henerasyon nga ipannakkel da ti aniaman a nagtaodan ken nagdaklan da a tradisyon ken lugar.
Immuna iti daytoy, inbatad ti presidente a ti nasao nga aktibidad ket maysa nga addang iti panangpaoigsa ti industriya ti turismo ken local livelihood ditoy probinsya.
Ti Tan-ok Festival ket tinawen a selebrasyon ti Ilocos Norte nu sadino a tampok iti bukod a panagfiesta dagiti 21 nga ili ken 2 a siudad ditoy Ilocos Norte.
