LAOAG CITY – Nagsaritan ni Pres. Ferdinand Marcos Jr. maipanggep iti pangta kontra kenkuana ken ni First Lady Liza Marcos ni Vice President Sara Duterte iti napalabas a lawas.
Inbatadna a makaalarma dagiti rakurak ti Bise Presidente nga ipapatayna isuda ken ti panagsasaona ti dakes iti publiko.
Segun iti Presidente, no kastoy laeng kaalisto ti panangplano iti panangpatay iti maysa a Presidente, kasanonto laengen kadagiti ordinario nga umili?
Inlawlawagna a ti kastoy a kriminal a pananggandatna ket nasken a saan a palabsen ken naigetna a kontraen.
Kunana kas maysa a demokratiko a pagilian, masapol a masurot ti rule of law.
Inpettengna kas maysa a mangidadaulo iti executive department ken amin nga agpapaay iti gobierno, isuna ket adda ti sinapataanna a responsibilidad a tungpalen ken aywanan ti Konstitusion ken dagiti linteg ti pagilian.
