LAOAG CITY – Kinumpirmaran ni Presidente Ferdinand Marcos Jr., a naka-schedule a makitaripnong ken ni US President Donald Trump tapno trataren ti nagduduma a napapateg nga isyu iti nagbaetan ti Pilipinas ken Estados Unidos.
Kuna ti presidente nga ado dagiti pagsaritaan da kenni Trump kangrunaan na iti trade, defense and security ken ti baro a pagannurutan ti Amerika iti immigration.
Kalikagom pay ni Presidente Marcos a pailawlawag ken ni Trump ti direktiba na mainaig iti pannakaisardeng paylaeng ti foreign aid ti Estados Unidos.
Inbatad na nga iti agdama ket saan pay a nalawag ti direktiba seknan iti panangipasardeng ni Trump dagiti ayudati Amerika kadagiti nagduduma a pagilian isut gapuna a nagkedked paylaeng nga agkomento ni Marcos.
Saan metten a dinakamat ni Presidente Marcos no kaano da nga agkita ken agtaripnong ken ni President Trump.
