LAOAG CITY – Inpakaammo ni Mr. Jhon Rey Salud, Presidente ti North Main Canal a nagbaliwda iti wagas ti panagmula gapu iti pangta ti El Nino phenomenon.
Segun kenkuana, dakkel ti epektona kadakuada kas maysa mannalon nangruna iti ili ti Bacarra ken Pasuquin daytoy a parikot.
Gapu iti daytoy, kunana nga adda ti naisayangkat a System Management Committee Meeting a bukbuklen ti National Irrigation Administration, Philippine Atmospheric, Geophysical and Astronomical Services Administration ken dadduma pay a maseknan nga ahensia ti gobierno.
Inlawlawagna a ditoy a napagsasaritaan dagiti addang nga aramidenda tapno saan a madadael dagiti inmulada a produkto agrikultura.
Inpalgakna a gapu iti dakkel a karit kadakuada iti epekto ti El Nino phenomenon ket mas pinilida nga agmula ti high value crops tapno saan a masayang ti panagregta dagitoy nga agtalon.
Kunana a dakkel a tulong ti maipakpakaammo kadakuada nga abiso manipod iti Philippine Atmospheric, Geophysical and Astronomical Services Administration tapno mapakadaan ken masaganaanda ti panagmula iti kataltalonan.
Mainaig iti daytoy, inadmitir ni Salud nga adda dagiti sumagmamano a kaduada iti sanjera a nangibaga a marigatanda iti panagmula gapu iti kinakurang ti danum iti lugarda rason nga in-inutenda ti danum a pangal-alaanda tapno mabiag met laeng dagiti inmulada.
Innayonna nga adda met dagiti naawatda a tulong manipod iti gobierno probinsial ti Ilocos Norte babaen ti Agri Ka Dito program.
