LAOAG CITY – Pinaigetan ni Presidente Ferdinand Marcos Jr. ti Technical Cooperation Council of the Philippines (TCCP) tapno mapalawa ti pannakikammayet ti Pilipinas kadagiti dadduma a pagilian.
Iti babaen ti Executive Order No. 115, inbilin ti TCCP nga ipatungpal ti programa a “Development Philippines” a mangipaay ti technical assistance kadagiti developing country.
Idadauloan ti konseho ti Department of Foreign Affairs (DFA) idinto a vice chair met ti Department of Economy, Planning, and Development (DepDev).
Responsibilidad ti konseho a siguradoen a naurnos ken maiyataday iti prioridad ti gobierno dagiti programa ken pannakitinnulong ti pagilian iti sabali nga estado.
Karaman kadagiti miembro ti Department of Agriculture (DA), Department of Environment and Natural Resources of the Philippines (DENR), Department of Science and Technology (DOST), Department of Trade and Industry (DTI), Department of Healthj (DOH), Department of Migrant Workers (DMW) ken Technical Education and Skills Development Authority (TESDA).
Maaddaan pay ti Technical Working Group tapno mabantayan ti panangipatungpal ti programa.
