LAOAG CITY – Naglikudan ni Mr. Rocky Ballesteros, Principal ti Sta. Rosa National High School dagiti alegasion kontra kenkuana a maipagarup nga inpublikar na ti sensitibo a ladawan ti maysa nga estudiante iti online.
Dimmatag a mismo ti Principal iti istasion ti Bombo Radyo Laoag tapno ipakaaamo a na-hack ti online account-na idi laeng sabado, Hulio 25.
Inbatad na nga idi aldaw ti Sabado ket adda laeng isuna iti uneg ti pagtaenganda ken nakumikom iti nagduduma a trabaho iti uneg ti balay da.
Innayon na nga apaman a simrek ti aldaw ti Lunes ket ditoy nga adda nangipakaammo kenkuana nga adda ti naikabil iti story-na a sensitibo a ladawan.
Inpakaammo na a ti madakdakamat a ladawan ti estudiante ket dati daytoyen nga agkamkamang kenkuana tapno agpabalakad pakaseknan kadagiti nagduduma a personal a problema na.
Kunana nga iti aldaw ti Sabado ket nairana a ditoy a nag-chat ti ubbing gapu ta adda dagiti maipagarup a mangak-akusar kenkuana nga addaan ti scandal.
Rumrumuar nga iti panag-chat ti estudiante iti Facebook account iti nasao a Principal ket ditoy a maipagarup a ti hacker ti mangkonkontrolen iti account-na no sadinno a possible a ditoy a maipagarup nga inpasend ti hacker ti madakdakamat a maipabpabasol nga scandal na, banag a tinungpal met daytoy ti estudiante.
Gapu iti daytoy, nakisarita ti Principal kadagiti nagannak ken estudiante, ken inlawlawagna a saan nga isuna ti akin-aramid iti daytoy.
Innayonna pay a kas pammaneknek ket impakitana ti log in history ti Facebook account-na a naka-log in ken naka-connect dagiti ti ado a gadgets.
Segun ken ni Ballesteros, kalikagum na a malpas daytoyen nga isyu gapu ta awan ti ammo na iti napasamak.
Kabayatanna, inpadanon ti Bombo Radyo Laoag daytoy nga isyu iti Department of Education Laoag ket insigida a nagtignay ni Atty. Donato Balderas Jr., ti Schools Division Superintendent ti Deprtment of Education iti Ilocos Norte.
Mainaig iti daytoy, personal a nagturong ni Atty. Balderas iti Sta. Rosa National High School iti ili ti Sarrat tapno ammoen ti umno a napasamak.
Inbatad ni Balderas a nakasaritana dagiti nagannak ken ti mismo nga estudyante no sadinno nga inbatad na a no kalikagumda ti agpila ti reklamo kontra iti nasao a Principal ket saana a lapdan dagitoy.
Impanamnama ni Balderas a saanda a baybay-an daytoy a kaso ken no mapaneknekan nga adda ti nagbasulan ti Principal ket saanda nga agpangadwa a mangipila ti maiyannatop a reklamo kontra kenkuana.
Iti agdama, kunana a silulukat ti ridaw ti ahensiada iti aniaman nga agbalin a desision ti nagannak ti estudiante pakaseknan iti daytoy a kaso.
