LAOAG CITY – Ginutigot ni Presidente Ferdinand “Bongbong” Marcos Jr. (PBBM) ti Kongreso iti maikalima nga State of the Nation Address-na (SONA) a palawaen ti income tax exemption para kadagiti mangmangged nga addaan ti pagsapulan agingga P350,000 tunggal tawen.
Gagem daytoy a makissayan ti problema dagiti middle class ken masalimetmetanda ti pinagrigatanda a sweldo.
Inpakaammo pay ti Presidente ti plano a pannakaipaikkat ti tax iti sweldo ti dadduma pay a wage earners ngem awan ti naipaay a detalye mainaig iti daytoy.
Inallukoyna pay ti Kongreso nga ilaksid ti babassit a negosio manipud iti corporate income tax ken palawaen ti amnesty para kadagiti saan pay a nabayadan a tax pakairamanan ti income, estate, donor’s ken value-added tax.
Iti agdama, mailaksid iti tax dagiti mangmangged nga addaan ti nababbaba iti P250,000 a manggedan iti tunggal tawen. Kabayatan a 20 a porsiente met ti mainayon a tax no nangatngato ngem iti nasao a gatad. Nupay kasta, saan a karaman ti pannakaamendar ti National Internal Revenue ti income tax exemption ceiling iti 52 priority bills ti Marcos adminitrasion.
