LAOAG CITY – Inreklamo ni Mrs. Marlene Jasal ti School Principal a ni Mr. Neil Acob gapu ti maipagarup a panangpatalawna ti anak na iti Pagudpud National High School.
Ti maipagarup a panangpatalaw ket gapu iti 4 a violations a naaramid ti anakna.
Nupay inadmitir ni Jasal nga adda ti violations ti anakna no sadinno a daytoy ket mainaig ti panagusar ti e-vape cigarette ken bullying.
Kunana a napaayaban daytoy iti pagadalan idi tapno solbaren dagiti nasao a violations ket kuna ti anakna a saannanton nga uliten.
Mainaig iti daytoy, ti maika-uppat a violation ket ti panagusar manen ti anakna ti e-vape cigarette.
Inbatad ti inana a natiliwan daytoy iti ruar ti pagadalan no sadinno nga agawid dan ken saan a kukua ti anakna a binulodna laeng daytoy.
Gapu iti daytoy, napaayaban manen ni Jasal ket ditoy nga inbatad ni Acob a pagtalawenna ti agina iti nasao a pagadalan nupay nagpakaasi ni Jasal.
Kuna ni Jasal a nangngeg daytoy dagiti sumagmamano a mangisursuro, nagannak, ken estudiante.
Kabayatanna, iti pannakisarita ti Bombo Radio Laoag iti nasao a Principal ket naglikudanna ti nasao nga alegasion.
Kuna ni Acob nga awan ti inbatadna a pagtalawen dagiti agina.
Segun ken ni Acob, 4 ti nagbalin a violations ti nasao nga estudiante no sadinno a naikkan pay daytoy ti gundaway tapno makapagbalbaliw ngem idinto a nagbalin nga 4 ti naglabsinganna ket gapuanan a na-kickout ti estudiante.
Kinuna ni Acob a daytoy ket maysa a wagas tapno madisiplinaran ti ubing.
Inlawlawag pay ni Acob a saan laeng a maiparit ti panagusar ti e-vape cigarette iti uneg ti pagadalan nudiket iti intero a Pagudpud.
Iti agtultuloy a pannakisarita ti Bombo Radio Laoag ken ni Jasal, iti agdama ket ginutigotda ti estudiante nga ituloyna ti agadal isu ti gapuna a nag-transfer daytoy iti St. Jude National High School.
Kabayatanna, daytoy a reklamo ket inpadanonen ti Bombo Radio Laoag ken ni Atty. Donato Balderas Jr., ti Schools Division Superintendent ti Depatment of Education (DepEd) Ilocos Norte para iti naun-uneg a pannakaimbestigar ken pannakresolbarna.
