LAOAG CITY – Binalakadan ni Atty. Alipio Castillo, ti Provincial Election Officer ti Ilocos Norte a saanen nga urayen ti Oktubre 30 tapno agparehistro dagiti botante.
Ummuna iti daytoy, maiyalud-od manipud Oktubre 11 agingga iti Oktubre 30 ti panagparehistro kalpasan ti panawagan ti publiko ken ti Kongreso.
Segun kenni Castillo, gundawayan ti naiyalud-od a panagparehistro wenno ti nawaya a pila tapno saan da nga agdudupudop intono madanon manen ti baro a deadline ti registration.
Mainaig iti daytoy, kuna ni Castillo a manipud Setyembre 1 agingga iti 29 ket nakaparehistro da ti 16,600 a botante no sadinno nga idi met laeng kalman ket nasurok sangaribo ti ballaigi a nakapagparehistro.
Kunana a ditoy probinsya, dandanin maabot ti target a bilang ti irehistro da a botante ken mangnamnama nga iti pannakayalud-od ti voter’s registration ket magun-od wenno ad-ado pay ti makarehistro.
Kabayatanna, kunana nga iti biang ti Comelec, kwalipikado laketdi ti maysa a botante nga umakar iti pagbutusan ket awaten da anyaman ti rason na.
Sungbat daytoy ni Castillo kalpasan a nasaludsod ti komento na seknan iti panagakar dagiti botante iti maysa a lugar tapno suportaran ti maysa a pulitiko nangruna ket nalpas ton ti panagpipilaan ti COC.
Maipalagip a no isuda nga opisyales ti Comelec ti masurot, saan da a kayat a maiyalud-od ti panagparehistro gapo iti dua a rason.
Karaman ditoy ti panakaapektar ti panagsagana da para iti eleksyon ket tapno saan kuma a marwam ti publiko nga aggaraw laeng no madanon ti deadline.
