LAOAG CITY – Indauloan ni Atty. Joel Gines, Provincial Election Supervisor ti umuna nga aldaw a pannakaipatungpal ti Comelec Gun Ban iti Brgy. Balatong ditoy siudad ti Laoag.
Daytoy ket kageddan ti panangrugi ti election period ita nga aldaw, Enero 12.
Kadua ni Atty. Gines ni Atty. Julius Balbas, Commission on Elections Officer ditoy siudad ti Laoag pakairamanan dagiti kameng ti Philippine National Police.
Nagbalin a naiget ti panangmonitor dagiti otoridad kadagiti amin a lugan a dumalyasat tapno maipasigurado nga awan met laeng ti ikot dagiti motorista nga aniaman a banag a maipawil kas ti paltog ken dagiti deadly weapons.
Kabayatanna, ti Comelec Gun Ban ket naggegeddan a naipatungpal iti intero a pagilian kas paset ti panagsagsagana iti mapaspasangasangan a 2025 Midterm Local and National Election.
