LAOAG CITY – Dakkel a tulong kadagiti opisial ti barangay ti naisayangkat a Provincial Liga Congress ti Liga ng mga Barangay idiay Batangas.
Segun ken ni ABC Federated President Ryan John Pascua, ibilangna a napintas daytoy gapu ta karaman kadagiti napagsasaritaan ket ti local legislation.
Malaksid iti daytoy, inbatadna a naibinsabinsa pay dagiti kaso a mabalin a sangoen dagiti barangay officials nga aglabsing iti paglintegan ken ti maipapan iti Barangay Council for the Protection of Children wenno BCPC.
Innayonna a babaen iti daytoy a wagas ket ad-adda a maimpormaran dagiti opisial ti barangay dagiti rumbeng nga aramidenda iti uneg ti barangayda para iti naur-urnoos ken napinpinstas a komunidad ken ti pagsayaatan dagiti umili.
