LAOAG CITY – Nangiruar ni Sen. Risa Hontiveros kadagiti dokumento a mangipakpakita iti posible a pakabigbigan ti ina ni Mayor Alice Guo iti maysa a Lin Wen Yi, maysa nga incorporator a karaman kadagiti adu a negosio ti Mayor iti Bamban, Tarlac.
Daytoy ket kalpasan iti pannakiuman ken ni Sen. Win Gatchalian no sadino ket inbutaktakna a mabalin a paneknekan dagiti residente ti Valenzuela nga idi agnanaed pay laeng iti siudad ti Mayor ket maysa a Lin Wen Yi ti rumrummuar nga ina daytoy.
Mainaig iti daytoy, kuna ni Hontiveros a dagiti co-incorporator ni Mayor Guo ket saan a bumaba iti pito kadagiti negosio kas ti QJJ Group of Companies, QJJ Farms, QJJ Embroidery, QJJ Meat Shop, 3LIN-Q Farm, QJJ Slaughterhouse ken QSeed Genetics kaduana dagiti kakabsatna nga isuda Shiela L. Guo ken Siemen L. Guo, ti ama a ni Jian Zhong Guo ken ni Lin Wen Yi.
Inbinglay pay ni Hontiveros ti maysa a dokumento ti Bureau of Internal Revenue a mangipaneknek kadagiti petsa ti pannakaiyanak ken address dagiti kakadua nga incorporator ni Mayor Guo a maitudtudo a miembro ti pamiliada.
