LAOAG CITY – Inpasigurado ti Malacañang nga adda ti umdas a pundo ti Commission on Elections (COMELEC) tapno maiwayat ti naikeddeng nga special elections iti maikapat a distrito ti Cavite kalpasan a napadisi iti Kamara de Representantes ni dati a Congressman Kiko Barzaga gapu iti disorderly behavior ken conduct unbecoming of a House member.
Inbatad ni Palace Press Officer Undersecretary Claire Castro a nakikoordinardan iti Department of Budget and Management (DBM) ken kinumpirmaran ti ahensia nga adda ti mausar a pundo ti Commission on Elections para iti daytoy.
Inlawlawagna nga umdas ti agdama a budget ti poll body tapno masolbar dagiti kasapulan iti special elections isut gapuna a saanen a kasapulan pay ti nayon nga alokasion manipud iti gobierno.
Target ti Commission on Elections nga iwayat ti special elections inton Agosto 29 tapno malitopan ti nabakantean a puesto iti maikapat a distrito ti Cavite.
