LAOAG CITY – Naarestar ti maysa a Person With Disability (PWD) iti naisayangkat a drug buy-bust operation iti Barangay Pasiocan, Bacarra, Ilocos Norte.
Nabigbig daytoy a ni Mr. Enrique Balas y Mariano, agtawen ti 35, residente iti Sitio Gaoiran, Brgy, Pasiocan iti nasao nga ili.
Naamoan a ni Balas ket maysa a drug surrenderee ken adda iti Drug watch list iti provincial level.
Naala iti ikot ni Balas ti pito a sachet a naglaon ti maipagarop a shabu ken ti sangaribo a pisos a nausar iti operasyon.
Nagkedked metten ni Balas a nagpainterview iti Bombo Radyo Laoag.
Ni Balas ket adda ti diperensya ti saka na gapu iti pannakadesgrasya na iti kallabes.
Kabayatanna, inbatad ni Barangay Kagawad Ramon Pascua iti Barangay Pasiocan a saanda a nagkurang ken nagliway a nangbagbaga ken ni Balas.
Innayonna a kanayun ti panangmonitor da ken ni Balas ket awan met ti masisiiman da a madi nga aramid na isut gapuna a nasdaaw da iti pannakaarestar na.
