LAOAG CITY – Manamnama nga umun-una iti testimonya ni Ramil Madriaga, a maitudtudo a dati a bagman ni Vice President Sara Duterte iti impeachment hearing intono Abril 14.
Daytoy ket basar ken ni Bicol Saro party-list Rep. Terry Ridon.
Inbatad ni Ridon a limitado laeng ti oras ti panagdengngeg manipod iti oras ti alas-otso ti bigat agingga iti alas-singko ti malem isut gapuna a kasapulan a maidatag a dagus ni Madriaga tapno maidasar ti affidavit na ken dagiti rakurak na.
Inpasigurado na pay a nakasagana ti komite iti panagdengngeg kadagiti agbalin a palawag dagiti testigo ken dokumento.
Karaman pay a paawagan ti pannakabagi ti Commission on Audit nga adda ti pakainaigan iti panagusar ti confidential funds, karaman dagiti opisyal ti Kamara de representantes nga adda ti pakainaigan iti napalabas a panagdengngeg ti Committee on Good Government.
Segun ken ni Ridon, namnamaen nga agsasaruno ti presentasyon ti ebidensya no palubusan ti oras, idinto nga ur-urayen pay ti kumpirmasyon no agatendar ni Atty. Michael Poa iti nasao nga hearing.
