LAOAG CITY – Nagkari ni Parañaque 2nd District Representative Brian Yamsuan nga agbiruk ti alternatibo a pondo para iti Commission on Higher Education (CHED) iti babaen ti 2027 national budget no mapagbalin a linteg ita a tawen ti nailungalong a maikkat ti travel tax.
Iti agdama, adda ti 40 a porsiyento ti pakabuklan ti koleksiyon manipod iti travel tax ti maikabkabil iti Commission on Higher Education.
Paset daytoy ti us-usaren tapno mapondoan ti Higher Education Development Fund (HEDF).
Segun ken ni Yamsuan, masapol a siguradwen a saan a maapektaran dagiti programa ti Commission on Higher Education, karaman ti scholarships, research ken dadduma pay a proyekto para iti higher education.
Immunan nga inbatad ni Commission on Higher Education Chairperson Shirley Agrupis a mabalin a mapukawan ti 85.6 porsiyento ti pondo ti Higher Education Development Fund no naan-anay a maikkat ti travel tax ken awan ti kasukat na a funding source.
Inaprubaranen ti kamara de representantes idi Marso 16 ti nailungalong a maikkat ti travel tax.
Kabayatanna, ginutigot ni Yamsuan ti Commission on Higher Education a konsultaren dagiti Local Universities and Colleges (LUCs) gapu ta ad-ado kadagitoy ti agbalin a kuwalipikado iti Tulong Dunong Program (TDP).
Mangipapaay ti Tulong Dunong Program ti agingga iti P7,500 iti kada semestre wenno P15,000 iti kada school year kadagiti kwalipikado nga estudyante iti kolehiyo.
