LAOAG CITY – Kiniddaw ni House appropriations committee chairman Rep. Zaldy Co iti Philippine Charity Sweepstakes Office (PCSO) nga isudan ti agbayad iti professional fees dagiti doktor a mangtamtaming kadagiti indigent patients.
Inaramid daytoy ni Co kabayatan ti budget briefing ti Philippine Charity Sweepstakes Office.
Inlawlawag ti agpanpanday linteg ti sumagmamano a karit iti implementasyon ti Medical Assistance for Indigent and Financially Incapacitated Patients Program (MAIPP) nga imanmanihir ti Department of Health (DOH).
Segun ken ni Co, adda dagiti pondo a maikabkabil kadagiti ospital ngem ti problema ket dagiti doktor gapu ta saan da nga umanamong nga ipa-cover iti Medical Assistance for Indigent and Financially Incapacitated Patients Program ti fees da gapu ta ti kayat da ket cash ken saan da a kayat ti aguray ti 30 nga aldaw.
Inpetteng ti Appropriations panel Chairman a kasapulan ti dagus a solusyon gaputa ti gagem ti Medical Assistance for Indigent and Financially Incapacitated Patients Program ket maipaay a dagus ti medical care kadagiti marigrigat a pasyente.
Inpaganetget na a kasapulan nga agtitinnulong tapno maipaayan ti maiyannatop a tulong dagiti marigrigat a Pilipino nga agkasapulan ti tulong.
Inlungalong pay ti agpanpanday linteg ti panagusar ti corporate credit card tapno mapaalisto ti proseso ti panagbayad kadagiti doktor.
Mamati ni Co a ti nasao nga addang ket ad-adda pay a mangpatalged iti collaboration ken panagtalek iti nagbaetan dagiti medical professionals ken ti gobyerno tapno masigurado a maipapaayn ti maiyannatop a medical treatment dagiti pasyente.
Pabor met dagiti opisyal ti Philippine Charity Sweepstakes Office iti inlungalong ni Rep. Co.
Kabayatanna, kalikagom ni Co a maaddaan ti linteg a mang-require kadagiti doktor nga agawat ti bayad iti babaen ti Medical Assistance for Indigent and Financially Incapacitated Patients Program.
