LAOAG CITY – Pimmusay ti maysa a lalaki kalpasan ti napasamak a pammagkong iti Brgy. 26 Katipunan St. ditoy siudad ti Laoag.
Daytoy ti kinumpirmaran ni PMaj. Christian Felix, ti Deputy Chief of Police ti PNP-Laoag.
Binigbig ni Felix ti biktima nga agtawen ti 37 ken residente iti Brgy. Buyon iti ili ti Bacarra idinto a ti suspek ket agtawen ti 20 iti Brgy. 26 ditoy siudad ngem agdama nga agnanaed iti Brgy. 28 ditoy siudad.
Segun ken ni Felix, nakalugan iti motorsiklo ti biktima idi ta sinada ti suspek ken dita nga adda ti nagbalin a komprontasyon dagitoy.
Kuna na nga idi bimmaba ti biktima iti motorsiklo dita a kellaat a binagkong ti suspek iti namin-ado a daras.
Inpakaamo ni Felix a dagus a naitaray iti Governor Roque Ablan Senior Memorial Hospital (GRASMH) ditoy siudad ti biktima ngem pimmusay bayat a matamtaming.
Mainaig iti daytoy, inpakaamo na a natiliw ti suspek iti pagtaengan ti lola na ken nakumpiskar ti kitchen knife nga agatiddog ti 13 a pulgada nga isu ti nausar iti pammagkong.
Immuna iti daytoy, inbunnanag ni Felix nga adda ti nagbalin a riri ti suspek ken biktima iti kallabes ken posible a daytoy ti motibo ti nasao a pammagkong.
Nu pay kasta, kuna nga agtultuloy ti imbestigasyon iti daytoy.
Nagtalinaed iti kustodyar ti PNP ti suspek ken maisagsagana ti kaso a murder a maipila kontra kenkuana.
