LAOAG CITY – Mapilitan dagiti umili iti maysa nga ili ti Ethiopia a mangpapatay iti ginasut a taraken nga aso kalpasan a natay ti tallo nga ubbing gapu iti rabies.
Nagballaag dagiti nabileg a grupo ti komunidad iti ili ti Hossana kadagiti umili a mamulta ken maarestar da no saan da a patayen dagiti aso da, uray no nabakunaan dagitoy para iti rabies.
Inparuk-at dagiti grupo ti komunidad ti nasao a pammilin kalpasan a natay dagiti ubbing nga agtawen iti 6, 8 ken 14, gapu iti pannakakagat da ti aso.
Malaksid kadagiti pimmusay ket adda pay ti 80 a sabsabali dagiti naospital gapu metlaeng iti pannakakagat da iti nasao nga ayop.
