LAOAG CITY – Nagpammarang kas nurse ti maysa a residente iti Sitio Dungtal iti Brgy. 23 ditoy siudad ti Laoag tapno laeng makaruar iti lugar.
Daytoy ti inpakaamo ni PLt. Col. Rafael Lero, ti chief of police ditoy siudad.
Segun ken ni Lero, nagpakada ti residente kadagiti agbanbantay nga opisyal iti checkpoint a mapan agirender ti duty.
Inbatad na a gapu ta nakaarwat kas nurse ti residente ket pinaglog-book da ken napalubusan a rumuar manipod iti nakalockdown a sitio.
Nu pay kasta, inbaga ni Lero nga adda dagiti dimmanon nga impormasyon kadakuada a nagtalinaed ti nasao a residente iti maysa a pagtagilakoan a kukua na.
Gapu iti daytoy, dagus a naiyuswat ti validation ket dita a nadanunanda ti suspek iti pagtagilakoanna.
Inbatad na a basar iti palawag ti residente ket nagtalinaed iti nasao a lugar tapno agirender ti duty kas maysa a pribadao a nurse iti maysa a senior citizen.
Kuna na nga inpatudo da ti pagpapaayan na ngem rumrumuar a saanda nga amamo daytoy.
Kabayatanna, inbatad ni Lero a basar kadagiti makaam-ammo iti nagpammarang a nurse ket naamoan a nabayagen a saan nga agpapaay iti lugar.
Innayun ti hepe a nagturpos iti kurso a nursing ti residente ngem saan a rehistrado.
Iti agdama ket nagtalined iti PNP Laoag ken naka-isolate ti nagpammarang a nurse bayat a maisagsagana dagiti dokumento para iti maiyannatop a kaso a maipila kontra kenkuana.
Maipalagip a naipan iti lockdown ti Sitio Dungtal iti nasao a barangay kalpasan a nakumpirmaran ti nagsasaruno a kaso ti covid-19.
