LAOAG CITY – Naka-swab test aminen nga empleado iti Laoag City General Hospital (LCGH) ditoy ciudad ti Laoag kalpasan a nagpositibo ti maysa a doktor iti nasao nga ospital.
Daytoy ti inbaga ni Doctor Elizer Asuncion, ti chief of hospital iti nasao nga ospital.
Segun ken ni Asuncion, iyur-uray da paylaeng ti resulta ti swab test dagiti empleado iti LCGH ken mangnamnama a rumuar to amin ti resulta na intono biernes.
Mamati ni Doctor Asuncion a negatibo amin iti covid-19 dagiti empleado iti LCGH.
Mainaig iti daytoy, inbaga ni Asuncion nga ad-adda a patien da nga iti mismo nga ospital ti nakaalaan ti doktor ti covid-19 virus ngem dagiti sayangguseng nga iti ili ti Bacarra a maibagbaga a napanan na sakbay a naduktalan a positibo ti virus.
Kabayatanna, inpasigurado ni Asuncion nga iti baet a nakalockdown ti nasao nga ospital ket awan ti problema iti sitwasyon dagiti pasyente da.
Innayon na a ti agsisinnublat a mapan mangasistir kadagiti pasyente ket dagiti naka-lock in nga empleado.
Inpasigurado ni Asuncion a no mapan asistiren dagiti empleado ti LCGH dagiti pasyente ket naka-full PPE wenno Personal Protective Equipment dagitoy.
