LAOAG CITY – Kinumpirmaran ni Police Captain Christian Felix, ti chief of police ti PNP-Pasuquin ti pannakatay ti maysa a lalaki gapo iti panagbekkel na iti Barangay 4 iti nasao nga ili.
Ti biktima ket agtawen ti 66, naasawaan, retirado a seaman ken residente iti nadakamat a barangay.
Segun kenni Felix, iti panagimbestigar da ket nadiskubre ti asawa ti biktima a nakabitin daytoy iti kwarto da isut gapo na a dagus na a pinuted ti tali.
Kunana a naitaray ti biktima iti Bacarra Medical Center ngem naideklara a dead on arrival.
Naamoan a ginandat manen ti biktima ti nagpakamatay iti kallabes kalpasan a nastroke ken adda ti parte ti bagi na a disabled.
Inbatad na pay a maipagarop nga agsagsagaba ti depresyon gapo ta rumrumwar a ti panagkita na iti bagbagi na ket awanen ti serbi na.
Iti agdama ket agtultuloy ti imbestigasyon dagiti otoridad seknan iti nasao a pasamak kalpasan a saan da pay maalaan a nalaing ti palawag ti asawa na gapo iti daytoy.
