LAOAG CITY – Kwinestyunaran manen ni Senador Rodante Marcoleta ti panangidaulo ti pada na a senador a ni Senate President Pro Tempore Panfilo “Ping” Lacson iti Blue Ribbon Committee mainaig iti imbestigasyon ti flood control scam, partikular dagiti maipagarop a kondisyon ni Lacson kas chairman ti komite sakbay nga itultuloy ti panagdengngeg.
Segun ken ni Marcoleta, maipagarop a parparigaten ni Lacson ti proseso ti imbestigasyon ti Senado.
Kuna na a saan a rumbeng a pagbalinen a lapped ti kinakurang ti pirma dagiti senador iti partial committee report tapno maitultuloy ti panagdengngeg ken maiparuk-at ti resulta ti imbestigasyon.
Inpetteng ni Marcoleta a mandato ti komite nga establisaren dagiti responsable iti pannakawaldas ti pondo ti umili, ngem arigna sabali a direksyon ti sursuruten ni Lacson nga inawagan na a maikontra iti kanayun nga ipetpetteng ti pada na a senador a panangsurot iti itudtudo ti ebidensya.
Inpaganetget ni Marcoleta ti maipagarop a pagkurkurangan ni Lacson kas chairman ti komite a paawagan dagiti personalidad nga itudtudo dagiti testigo kadagiti immuna a panagdengngeg.
Maipalagip a nabayagen nga ipetpetteng ni Marcoleta a paawagan ni dati nga Speaker Martin Romualdez kalpasan nga intudo ni Orly Guteza iti panagdengngeg ti komite ken ni dati a kongresista Zaldy Co kadagiti serye ti videos nga inparuk-at na iti internet.
Kalpasan iti daytoy, inpalgak ni Marcoleta a napateg a maitultuloy ti panagdengngeg aglalo no maisubli iti pagilian ni Co a kuna na a mabalin nga agbalin a napateg a paset ti panangbukel ti pakabuklan a ladawan iti kaso.
Kabayatanna, naglikudan ni Lacson ti rakurak ni Marcoleta gapu ta namindua a daras a nangipatulod ti komite nga idaulwan na ti imbitasyon ken ni Romualdez ngem saan nga agat-atendar daytoy kadagiti panagdengngeg.
