LAOAG CITY – Agtultuloy ti panangtulong dagiti miembro ti Manila Red Wolf Riders Club dagiti naapektaran a residente iti agtultuloy nga ashfall manipud iti Taal Volcano idiay Batangas.
Kinumpirmaran ni Mr. Albert Llobrera, mangidadaulo iti Manila Red Wolf Riders Club nga immunan a nangipatulod da ti tulong idi Domingo ngem sumaruno a mangted dagiti kagrupo da manipud Novaliches, Quezon City.
Binalakadan na dagiti riders nga agusar ti full-face helmet ken N95 mask tapno saan da a malang-ab ti asok manipud ti bulkan ngem iti idadanun da iti naapektaran a lugar ket naglugan da ti 4-wheels tapno maidanun ti tulong kadagiti residente.
Kangrunaan nga ited ti grupo da ket dagiti canned goods ken adu a danum a kasapulan dagiti naibakwit a residente, arwaten, ken face mask.
Inbutaktak ni Llobrera a ginundawayan dagiti negosyante iti nangipangato ti presyo ti face mask a naingpis gapu ti mapaspasaran ti Batangas.
Immabot iti 250 a pisos iti kada 50 a pidaso ti face mask idinto a ti dati a presyo na ket maysa a piso ti maysa a pidaso.
Nagpanawagan ni Llobrera iti panagtulong dagiti riders saan laeng nga iti Ilocos Norte ngem ketdi isu amin a grupo para kadagiti agkasapulan a residente idiay Batangas.
Kabayatanna, nakasaganan ti Ylocandia Biyaheroes Rider Club ken dadduma pay a club a mangipaay ti tulong idiay Batangas babaen kadagiti naukkon da a relief goods arwaten ken dadduma pay.
