LAOAG CITY – Inlungalong ni Russian President Vladimir Putin ti direkta a panagsarita da ti Ukraine iti Istanbul intono Mayo 15 tapno trataren ti saritaan ti kapya ken mangituding ti manayun a talna.
Mangnamnama ni Putin a maragpat ti maysa a manayun a solusyon imbes a temporaryo laeng a pannakaisardeng ti rinnupak tapno balbaliw nga armasan dagiti tropa.
Ti nasao a lungalong ket inaramid ni Putin kalpasan ti nagsasaruno nga agarop tallo a tawen a gubat a nangrugi idi Pebrero 2022 idi rinaot ti Russia ti Ukraine no sadinno a mapatta-patta a rinibo a soldado ti pimmusay, ken nagtultuloy ti tensyon iti nagbaetan ti Russia ken dagiti kaalyado a pagilian ti Ukraine iti Europa.
Iti rakurak ni Putin, ginutigot na ti Ukraine nga itultuloy dad dagiti direkta a negosasyon nga awan ti aniaman a kondisyon ken masapol a mapagsaritaan daytoy a banag iti Istanbul intono hwebes, Mayo 15.
Innayon ni Putin a nakikoordinaren ken ni Turkish President Recep Tayyip Erdogan taono tumulong para iti naurnus a dayalogo a possible nga agresulta iti maysa a ceasefire.
Kabayatanna, insungbat met ni Ukrainian President Volodymyr Zelensky a nakasagana a makipagkita ken ni Putin para iti ceasefire talks.
Kuna na pay a ti panangikonsiderar ti Russia a mapagngudon ti gubat ket maysa a positibo a senyales.
