LAOAG CITY – Nasugatan ti akin-kannigid a paset ti ulo ti maysa a lalaki kalpasan a pinaltugan dagiti naglubbon iti maysa a motorsiklo iti by-pass road a paset ti Barangay Pila ditoy ciudad ti Laoag.
Nabigbig ti biktima a ni Melvin Bugaoisan Pacion, agtawen ti 51, salesboy iti maysa nga auto supply ken residente iti Barangay Dibua ditoy ciudad.
Inbaga dagiti nakakita iti napasamak, aggapo iti daya ken agpapalaud a direksyon ti biktima a nakalugan ti maysa nga Owner Type Jeep idi paltugan dagiti sumarsaruno a naglubbon ti motorsiklo.
Mainaig iti daytoy, inbaga ni Police Lt. Col. Rafael Lero, ti chief of police ditoy ciudad ti Laoag nga agtultuloy pay laeng ti naiget nga imbestigasyon da tapno maamoan ti kinatao dagiti suspek ken no ania ti motibo iti krimen.
Innayon ni Lero a narekobre iti nakapasamakan ti krimen ti slug ken empty shell ti saan pay a masinunuo ti kalibre na a paltog.
Inpakaammo ni Lero a naitaray ti biktima iti Governor Roque Ablan Senior Memorial Hospital (GRASMH) ditoy ciudad ti Laoag ngem naiyakar iti Mariano Marcos Memorial Hospital and Medical Center (MMMHMC) iti ciudad ti Batac.
Innayon na nga agpapan maisursurat daytoy a damag ket saanna pay a masigurado no anian ti sitwasyon ti biktima.
