LAOAG CITY – Inbatad ni Bokal Saul Lazo nga inimbitaran da ti Philippine National Police, Land Transportation Office, ken dagiti nagduduma a Local Government Units iti naiyuswat a public hearing maipanggep iti ti inpasa na a pedestrian lane ordinance ditoy probinsya.
Segun ken ni Lazo, maobserbaran na nga arigna mapukpukawen ti importansyati pedestrian lane.
Gapu iti daytoy, kuna na a nangipila ti ordinansa tapno mapalagipan dagiti motorista ken dagiti dadduma nga indibidual a masapol a respetaren ti pedestrian lane.
Kuna na a nailungalong met ti panagnayun kadagiti CCTV wenno Closed-Circuit Television kadagiti kalsada iti intero probinsya tapno makita no siasinno dagiti aglabsing iti nasao nga ordinansa.
Mainaig iti daytoy, inpetteng ni Lazo a masapol koma pay a dagiti pedestrian lane ket saan laeng a pinta ti mausar gapu ta adda ti specific a materyales a rebbeng nga isu ti pagaramid iti pedestrian lane.
Innayon na a kalikagom da pay a maala amin ti traffic code iti kada municipyo ken ciudad ditoy probinsya ken namnamaen da naka-identify ditoy ti pakaestablisaran dagiti pedestrian lane.
Kabayatanna, inrakurak met ni Bokal Hanson Chua ti panangsuporta na iti ordinansa nga inpasa ni Bokal Lazo, ngem kuna na a masapol koma a dagiti mangiyus-uswat ti konstruksyon kadagiti kalsada ket ammo da a tarimaanen dagiti maapektaran a pedestrian lane.
Dinillaw pay ni Chua dagiti mangbakbakbak kadagiti kalsada a no adda ti magaburan da a pedestrian lane ket saanda pulos nga ammo a tarimaanen ken ikkaten dagiti maigabor tapno adda latta koma ti mausar a pedestrian lane.
