LAOAG CITY – Kalikagum ti Sangguniang Panlungsod ditoy siudad ti Laoag nga adaptaren ti Speak Up I’m Here ti gobierno probinsial ti Ilocos Norte tapno matulungan dagiti makapaspasar ti mental health issues nangruna kadagiti agtutubo wenno agad-adal.
Daytoy ti indasar ni Konsehal Jaybee Baquiran kabayatan ti naisayangkat a regular session ti konseho.
Mainaig iti daytoy, inbatad ni Konsehal John Michael Fariñas, ti Chairman iti Committee on Education ditoy siudad ti Laoag a pudno a kasapulan dagiti estudiante ti pannakaitandudo ti mental health awareness nga isu ti kurang iti educational system ditoy probinsia.
Inbatadna a nasayaat no adda ti maputar nga ordinansa ditoy siudad ti Laoag a mangted proteksion kadagiti umili a sumangsango iti depresyon.
Kabayatanna, inlawlawag ni Konsehal Bryan Alcid nga addan ti pannakisarsaritada iti Department of Education maipanggep daytoy a banag no sadino nakasarsaritadan dagiti principal ken mangisursuro manipod kadagiti nagduduma a pagadalan ditoy siudad ti Laoag pakaseknan iti daytoy a banag.
Naammoan a kiniddaw ti Sangguniang Panlungsod a masapol a maymaysa laeng ti numero a mabalin a tawagan dagiti maseknan nga agkasapulan ti tulong tapno saan nga agbalin a kumplikado.
